dimanche 5 mai 2013

البلاد هازها الواد والنهضة تقول عامين صابة

هاذي حكاية من حكايات كان يا ما كان،
يمكن نحكيوها لصغيراتنا، يمكن نقرّيوها في تاريخنا، المهم حكاية ولازمها تتحكى
أيّا يا سادة يا مادة يحكيوا على بلاد، بلاد صغيرة وكبيرة... بلاد عمرها أكثر من 3000 سنة
بلاد تمشي في شوارعها وشوارعها  تسريلك في دمّك، بلاد تحب قهاويها، بيرانها، جوامعها وزويها... بلاد تكره سينماواتها الفارغة ومسارحها المسكرة ودور ثقافتها المهجورة
بلاد تسرح مع ريحة فلها وياسمينها وتفيق على ريحة زبلها
بلاد بحرها دواء، ليلها ونس، نسمتها ترجع الرّوح
بلاد كيف تغزر لحيوطها تقرى حكايتها وتحس وجيعتها وفرحتها وما تهز كاسك كان للي عشقها وعشقتها
بلاد تعيش فيك كيف تعيش فيها، حبها يذلك، تبكّيك وتسهرك، تقتلك وتوجعك، برشا ولادها سبّوها ولعنوها في النّهار مياة مرّة ووهربوا منها ورجعوا يبكيوا مالوجيعة الكلبة
بلاد اسمها تونس وهي تونس
أيا يا سيدي نهار كثر الهم والمشاكل والظّلم في البلاد هاذي، ولادها حسّوا بالقهر خرجوا وعملوا حاجة سمّاوها ثورة وفرحوا بيها وقالوا ماليوم "لا خوف لا رعب السّلطة ملك الشّعب" وحلفوا ماعاش يخلّيوا حد يتعدّى عليهم
ونهار طلع البدر علينا، وبدر هذا شيخ من شيوختنا اللّي عانى ياسر قبل وناضل ياسر وتعب ياسر في بلاد الكفّار لندرة، وتعذّب ياسر في قصرو غادي تي المفيد حاسس ياسر ببلادو وأولادها اللي يقولوا مشاكلنا خدمة وفقر وفساد وكساد وحرّيّة وهو يجاوبهم "عندي الحل، عندي 365 حل غير انتخبوني" وصدقوا الشّعب الزّوّالي، لازم يصدقوا ماهو من جماعة اللّي يخافوا ربّي، باش يكذب وهو يخاف ربّي؟
أيا المهم جات الانتخابات اللي شعب كامل يحلم بيها ويستنى فيها وقلنا هذا عرس، عرس تونس... ماكنّاش نعرفوا اللّي تونس باش يشدها راجلها اللّي يخاف ربّي ليلة عرسها بالسّيف ومن وقتها وهو يشد فيها بالسّيف... ويقول حلالي وشرعي(تي
أيا سيدي من 23 أكتوبر والشّعب يقاسي ونوّابو يقولوا عايشين في حلم... الحقيقة كنت ناوية باش ناخذ وقتي ونعاود نرجع من نهارة 23 أكتوبر لليوم بالنهار بالنهار باش نحكي عاللّي صار وبعد قلت لو كان نحكي عندي ما يعبّي كتب وزيد ربّي عطانا نعمة (ولا نقمة) النّسيان وأنا نخاف على روحي كان نتفكّر كل شيء عاد قلت نكتب كان اللّي متفكرتّو ومن غير ترتيب والسّماح في الباقي
أيا سيدي الأسوام شعلت نار، المستثمرين هربوا، شركات سكرت، الدّيون كثرت، عفو تشريعي عام، السّرقة، البراكاجات، عفو تشريعي عام، حبسان عباد على خاطر أفكارهم (جابر ماجري وغازي باجي) ولاّ إنتقام (سامي فهري)، عفو تشريعي عام، ضربان الصّحافة والصّحافيّين (اعتصام التلفزة، سفيان الشورابي، نجيبة الحمروني، زياد الهاني...)، تكبييييييير وتسكير المواخير، عفو تشريعي عام،  اعتداء على العلم، تسكير كليات إهدار المال العام في الشيراتون، عفو تشريعي عام، غزوة المنڨالة، السّياحة ماتت، عفو تشريعي عام، قمع احتجاجات سلميّة كيف في 9 أفريل وشد المواطن هرسو بطريحة ولا كيف في سليانة ورش الرّشراش، والمعتصمين نحبّوا نقصّولهم يديهم وساقيهم،عفو تشريعي عام، تكفيييييييييير وتمخوير، قسمان المجتمع لمسلم وكافر وتحريض على حرب أهليّة، تهديد بنصب المشانق، عفو تشريعي عام، اغتصاب، لجان حماية الثّورة، تكسير، تهديد، قتل، عفو تشريعي عام، السّلفيّين والسلاح يدور، أحداث السفارة الأمريكيّة، أبو عياض وأبو أيّوب، عفو تشريعي عام، اغتصاب، اغتصاب جماعي، اغتصاب طفلة صغيرة، عفو تشريعي عام، اغتيال سياسي وشكون قتلو؟، إهدار المال العام مرة أخرى ونواب تخلص مرتين ووزراء يخلصوا مرتين، عفو تشريعي عام، مازلنا ما نعرفوش شكون قتلو،  أعمال عنف، السّلفيين وديما السّلفيّين ، عفو تشريعي عام، ومازلنا ما نعرفوش شكون قتلو، تونسة نبعثوهم لسوريا يجاهدوا مع الصهاينة،  تفجيييييييييير وألغام والشعانبي، الساقين طارت والعينين خرجت آما فزّاعة ومايلزمناش نهولوا، بوليس مذبوح... أيّا وقيّت متاع عفو تشريعي عام
إيييييييه كيف نتفكّر، صحيح من نهارتها عايشين تقولش علينا في حلمة، حلمة خايبة نستنّاو باش نفيقوا منها... هاو هاززنا الإرهاب والنهضة مازالت تقول صابة خلّيونا نزيدو نخدمو
يا ولاد تونس، يا أحرار تونس، ياللّي قلتوا "لا خوف لا رعب السّلطة ملك الشّعب" وحلفتوا ماعاش تخلّيوا حد يتعدّى عليكم وينكم؟؟ بلادنا باعوها وبأرخس الأسوام... تونس تنادي فهل من مستجيب؟

2 commentaires:

  1. جرد للواقع.. للجرح الغائر... للذات المكلومة.. فمتى نتحوّل من العزم إلى الفعل
    "لا خوف لا رعب السّلطة ملك الشّعب"
    متى؟؟؟؟؟؟؟؟

    RépondreSupprimer
  2. كانك عليا مالبارح يا باخوس، من قبل ما يمشي شكري، من قبل ما يموت لطفي... أرواحهم في رقبتنا

    RépondreSupprimer